Origjina, vizioni dhe statuti

Rrjeti për Zhvillime Demokratike RrZhD është rrjeti i parë multietnik i këtij lloji në Kosovë. Është themeluar në korrik të vitit 2003 nga 13 anëtarë dhe përbëhet nga përfaqësuesit e 7 Qendrave të Komuniteteve (QK), 5 Qendrave të Resurseve të OJQ-ve (QRO), dhe 1 Zyreje të Demokratizimit (PD). Që të gjitha këto qendra fillimisht ishin themeluar nga OSBE-ja si pjesë e programit të vet të përgjithshëm për promovimin e krijimit të një shoqërie civile aktive dhe demokratike në Kosovë.
Meqë këto qendra kishin qëllime dhe synime të ngjashme, disa menaxherë të qendrave konsideronin se bashkimi i tyre në një rrjet do të ishte i një dobije të ndërsjellë. Në këtë mënyrë, Qendrat e RrZhD do të ishin në gjendje që së bashku të promovojnë aktivitetet dhe projektet e përbashkëta, dhe së këndejmi edhe do t’i tërheqin më lehtë donatorët dhe të siguronin përkrahjen e institucioneve vendore.

Kështu, në takimin që u mbajt në Brezovicë në korrik të vitit 2003, që të gjithë përfaqësuesit e qendrave ranë dakord që ta formojnë RrZhD-në (Rrjetin për Zhvillime Demokratike). Njëherësh, në këtë takim u zgjodhën edhe Kryetari i asociacionit, Zëvendëskryetari dhe 3 anëtarë tjerë të Bordit Ekzekutiv.

Statuti i RrZhD dhe Kuvendi Themelues u përgatitën me përkrahjen e OSBE-së përmes “Projektit të rrjetit multietnik të Web-it” të zbatuara nga QRO Prizren dhe financuar nga Fondi Minoritar për Investime të Vogla (SIMF- Small Investment Minority Fund) i Qeverisë Holandeze.
RrZhD synon ta promovojë zhvillimin demokratik të shoqërisë civile, duke punuar me të gjitha komunitetet dhe duke provuar se barazia dhe bashkëpunimi mund të bëhen pjesë e jetës së përditshme edhe në Kosovë.

RrZhD është i regjistruar në UNMIK si OJQ jo-fitim prurëse (UNMIK Nr. i Regj. 5102263-7).